From the UKAuthors Collection
Over The Sea To Skye
By zenbuddhist · Originally published 25 August 2003
Some friends enjoy a weekend on the beautiful Isle of Skye
‘Half each`ll dae yis,’ that’s what he had said tae me. I `m rollin it aroond in the glass o ma shades wi ma pinkie, wonderin how the fuck I was supposed tae cut it in half . It wis wee`r than the dode o shite that comes oot o a baby gerbil`s erse. The bog door starts rattlin. It`s the McGloosh.
‘C’mon tae fuck ye cunt, let us in.’
‘Aye, aye, hud on ye fuckin desperado, ah’ve got tae be careful here ye ken.’ Ah slide the bolt back, an his red excited puss comes leerin through the gap like a fuckin chilli pepper - aw dried oot an wrinkly.
‘What the fuck r ye on aboot, thought ye were gettin some whiz.’
‘So did ah. Look what the fucker gie me!’
‘Jeez Louise that`s acid is it no?’
‘Naw, no accordin tae him it`s no, he says it wis speed, an ah wisnae aboot tae start arguin wi the big cunt. He says tae just take half each, it’s as strong as fuck. Accordin tae him.’
‘Ach well, ye can only piss wi the cock ye’ve got. Here gies it here, ah’ve got a razor blade on us.’ We tan the tiny crumbly tablet an make oor way back through tae the throng o the pub. This wis gonna be mad. Seemed as if half the toon wis goin or wantin tae go. Every cunt scoopin it up at the bar, shoutin an bawlin at the tap o the fuckin voice, aw that restless, keen way that ye get. Ah wis glad ah had a place booked wi Shortie, mind you it wis only fair cause ah’d takin ma car last year - the one that wis the size o a breeze-block the noo. The Skye Folk Festival, too fuckin right man, ye can stick aw yer Glastonburys an yer Readings up yer fuckin erse, this wis the gig man, as far as we were concerned anyways. An Shortie’s van’s got a gallus, fuck-off, blarin stereo in it an aw!
‘Ah luv travellin like this,’ ah says tae the MacGloosh.
‘What, in the back, comfy on aw the sleeping bags n tents, next tae the Pogues commin oot the speakers, an a case o export at oor feet, cannae think why?’
‘Hahaha, aye that n aw right enough, naw ah wis meanin lookin oot the back o the van, sortae seein where ye`ve been, rather than where yer goin, ken.’
‘Aye, so if Shortie totals it and we survive, we’ll see his heed rollin along the road likes.’
‘Hahaha, fuck off ye mental cunt.’
‘What,’ he says, like in a huff, an ah realise he wis bein serious.
‘Pass us up another can,’ says Stevo who’s sittin in the passenger seat, like a fuckin lord.
‘Aye an dinnae be fuckin bangin that yin aff the fuckin dash ye cunt, nae fuckin respect,’ moans Shortie, ‘ah’ll hae yin an aw.’
‘Want me tae open it fur ye? Eh? Ah mean ahm sure ye`ve got yer hands fu, what wi hoggin that joint, playin wi yer cock an tryin tae keep this fuckin scrapheap on the fuckin road.’
‘Its better than walkin, ye cheeky wee bastard.’
‘Now, now lassies, here, an dinnae drink them aw at once eh? There’s only sixteen left!’
‘Eh! Fuck sake China, how mannies that yous pair o cunts in the back`s drunk noo?’
‘Same as ‘yous pair o cunts’ in the fuckin front, they dinnae last forever ye ken.’
‘Well ah`ve only had four an so`s Shortie so either yous are at it or ah cannae count.’
‘Haarghhaarghhaaa wait ah minute Stevo ah’ll try an work that yin oot. Ya fuckin doss cunt.’
‘Haud on, haud on, ah dinnae fuckin believe it! Shut it yous pair, look who`s up here thumbin it.’
‘WHO’
Screw-tap n Buckfast that wis who. Stevo rolls doon the windae.
‘Hey yous punks, have ye no got anythin better tae dae than stand oot here gein aw us normal folk the finger, eh? C’mon get in. China an McGloosh’ll make room fur yis.’
‘Aw fur fuck sake, there’s nae room in here as it is,’ goes the McGloosh, aw pit oot cause he used tae go oot wi Buckfast yonks ago, an now they didnae speak tae each other. The feelin seems tae be mutual cause she squeezes in next tae me, winks, an offers me a swally o her favourite tipple - a nice little tonic wine fermented by the blessed Benedictine monks o Buckfast Abbey.
‘Fuck sake Screw-tap, ah dinnae mind the bondage chains stickin intae us so much, but gonnae get that fuckin bog-brush o a Mohican oot o ma puss.’
‘It’s no a Mohican, its a Mohawk.’
‘Is that right, well if ye dinnae shift, ittle be the fuckin last o them, whatever ye want tae call it!’
‘That’s nice that is, an here wis me gonna offer ye some o these,’ an he pulls oot a massive bag o dried-oot shrooms.
‘Whoa ya beauty,’ goes McGloosh, and helps himsel tae a big handfu. I just cannae understand that cunt sometimes. I`m oot a ma tits on that wee pill, so he should be an aw. Mind you its no that dificult tae figure oot - he`s a greedy bastard! The bag gets passed tae the front after ah refuse and Stevo gets wired in. Ahm lookin at Shortie, oor chaufoor fur the trip, no only is he tryin tae juggle; a joint, a can o beer, drivin wi the foot doon tae the boards, now he`s tryin tae stuff his puss wi magic mushrooms. This could end badly. Maybe no though, I’m sure Neal Cassady would have been proud.
The queue at the ferry port is long, really long. Shortie jumps oot his seat and slams the door.At first ah think he`s gonna lamp some cunt but he`s just trying tae get a better spec tae see what’s goin on. He squeezes his hands thegether an his massive erse back intae the van.
‘Looks like we`re gonna be here a while folks, lets hit the boozer.’
‘Yesss,’ goes Stevo.
‘No you, ye fuckin wido, someones gonna hae tae stay wi the van, an there`s no fuckin straws. So its you.’ Stevo`s puss is trippin him [which suits him fine, cause he`s trippin] but he doesnae argue too much cause he kens he`s pushed it a wee bit too far wi the big man. So we make oor way tae the pub wi Shortie mutterin aboot; cheek... an empty cans thunderin aff his dashboard... an serves the smart cunt right... blah, blah. But there`s no blah blah when we walk intae the bar, the opposite in fact, ye could tell there had been though. Hardly surprisin right enough when ye consider what we look like; every cunt`s wearin shades, Shortie resembles a refugee from the WWF, Screw-taps Mohican is dyed bright green, Buckfast is the spit o Souxsie Sue, an we`re aw oot oor fuckin nuts, greetings teuchters.
‘It`s no Fuckfast it`s Buckfast an` anyway ah dinnae, no unless ahm on tap, an ah wouldnae climb on tap o you, ye fuckin hairy-faced bam, supposin ye were the last man alive.Ye`ve probably shagged that many sheep yer cock looks like it should be floatin in a jar doon at the pox museum.’
Ye could tell that the nosey-bastard, dung-flinger was wantin tae scone her one, but what could he dae? Even his mates were laughin at him. We were aw in stitches, so he decides on option two an comes over aw that challengin way that ye get. Its at times like these that ye feel glad ye`ve got a mate who looks like he crushes wasps bikes wi his bare hands fur a livin [and probably could!]. Shortie stands up. The guy hesitates. He`s no a bad size himsel. The manager moves fast. He`s roond the bar wi his hands up. Palms stretched oot between them.
‘Right, enough,’ he says ‘none o that in here, I think its time yous left.’
‘We`re goin nowhere till we finish oor drinks,’ spits oot Shortie.
‘Fair enough, Murdo I think your pint`s at the bar is it no?’ The Murdo guy grunts an moves back tae his drink, scowlin an mutterin, but obviously glad he`s saved a wee bit face. Buckfast comes back wi the pints lookin at Screw-tap wi muderous intent. We drain oor beers an start tae walk oot.
‘Aye an dinnae bother commin back,’is Murdos brave farewell
‘WHAT,’ goes Shortie, turnin on his heels. Ah stand in front o him.
‘C`mon Shortie what’s the point, eh? we`re gonna get lifted an we`re no even there yet, fur fuck sake. Ye can tell the cunt’s a no-worth-it, fuckin erse, lets just get tae fuck an` enjoy oorsels eh?’
‘Aye yer right China, lets dae one.’
‘Aye Stevo`ll be wonderin where we`ve got tae anyway.’
‘Fuck that cunt,’ groans the not so gentle giant.
His mood improves a wee bitty when we get back tae the van, how could it no? Ye could hear David Bowie`s ‘Man Who Sold The World,’ from the tap o the hill an we`re aw giein each other the knowin look. Stevo, the die hard Bowie freak has got the stereo on full pelt and ye just know he`s singing along like a rock n roll star. Fuckin eejit. Sure enough the cunt`s got the windae doon, like a posing git, mouthin aw the words wi his bug eyes bulgin oot the sockets so far ye coulda preened them like deed roses. I take aff ma shades an hand them tae him.
‘Here ye fuckin prick, pit these on, yer scarin the natives.’
‘Wham-bam-thank-you-man,’ he goes in his best Ziggy voice an ah just burst oot laughin. We aw do! The ferry`s commin back though an the van`ll get on this one nae bother. Yess, soon be on real teuchter soil - the inner Herbrides, the Ise of Skye, the venue. Not that it’s far away, you can see it, it seems as if ye could chuck a stone over, well maybe even Shortie would struggle tae dae that, but ittle no be long noo. So everyone’s got a smile on their puss, but its hard tae tell if Buckfast is grinnin or grimacin sometimes.
Well ye ken that ye`re on a boat an that but it’s no exactly rollin on the high seas, still it’s more than enough fur the McGloosh. He looks as if he`s gonna spew. Serves the greedy bastard right, it wis him that guzzled maist o the cans on the way up.
‘Haha what’s up Mac yer no lookin too good there ma man, ah think ye better sit doon.’ Ah`m waitin fur a smart reply or an insult, but no. Not this time. Must be bad. Next minute he lunges seawards an a jet o broon vomit comes flyin oot his mooth an splatters intae the back o this bairns heed, who’s holdin hands wi his mammy. The poor wee guy gets the shock o his life an instantly starts howlin an greetin. His mam doesnae realise just what’s happened tae start wi, she`s like admirin the scenery an that, but things dinnae tend tae appear so idylic when ye`re wee toddler`s just been covered in foul smellin sickness.
‘You dirty man, you dirty, dirty man,’ she`s sayin tae McGloosh, but he`s hingin oer the rails retchin oot what’s left o his stomach contents intae the sea, oblivious. Which is kinda lucky fur him cause it looks as if this could turn a wee bit nasty. Ahm wonderin where the daddy is!
YE FUCKIN BASTARD YE FUCKIN COWARDLY FUCKIN BASTARD YE NEVER EVEN STOOD UP FUR ME YE FUCKIN BASTARD
Naw ah dinnae believe it, it`s Buckfast doin her nut at Screw-tap further up the ferry. Shortie n Stevo are in the van, fuckin great, so ahm on ma own. Its like the parting o the Red Sea or somethin, folk just clearin oot the way lettin them get on wi it. They`re locked thegether and its hard tae figure oot just who`s tryin tae chuck who o`er the side. Ahm no feelin up tae this but ah steam in-between them tryin tae split them up. An old guy wi a uniform on appears an between us we manage tae prise them apart. Ah`ve got a hud o Buckfast but she`s mad and fu o that kind o strength that ye get when ye lose it. She struggles free an gets a wine bottle oot her coat pocket an lobs it o`er at Screw-tap an the old guy, it misses, but smashes on the deck just in front o them. Then she just aboot turns an storms off. Screw-tap shouts some insult after her an storms off in the other direction. The engine roars in reverse an slows the boat, so we`re nearly at the other side - thank fuck.
But ma ordeal`s no over yet. The old guy`s givin it the; this is a quiet place....n folk`r no used tae this....n skunk rockers.....n hooligans.....blah blah. Which is right, ah mean the guy`s got a valid point here. Ahm no arguin. Ah agree wi him. But what ah dinnae agree wi is that it’s me that deserves aw the fuckin grief. But ah keep ma puss shut, mumble an apology, an slope off the ferry, intae the van, an we`re soon speeding along the road tae the ceilidh - minus oor more colourful companions. Thank fuck.
The Mcgloosh doesnae look as if he`s gonna be burlin roond in many eightsome reels though. He`s got his heed stuck intae a plastic bag coughin an splutterin an he`s screamin at Shortie tae slow doon goin oer aw the bumps n potholes. Shortie of course is laughin his heed aff steerin towards them.
‘What the fuck`s up wi ye, ye fuckin lightweight, we`re carryin no wounded by the way, says so in the manual, haha roll a joint China we`re nearly there.’
‘A joint, now we`re talkin,’ goes the apparition.
Haha woa haud on there Mac, a joint`s aboot the last thing you look like yer needin right the noo.’
‘How,’ he says, aw put oot like.
‘Cause ye look like somethin oota ‘Life On Earth,’ that’s fuckin how.
‘Hahaha, ‘Life On Earth’ what species China,’ inquires Stevo.
‘Well ah dinnae ken’, an ah take a closer look at McGloosh; his gills have gone aw green, eyes like peeled tomataes, an his tongue`s spew-dyed dark broon. ‘No for sure anyways, but ah`ll take a wild guess ona Amazonian tree frog.’
Ahahahargh, did ye here that yin Shortie, we`ve got a rare species in the van, quick get the camera oot. Is it poisonous China?’
‘Hard tae say, but by the smell commin aff the cunt ma guess is.. aye the fucker`s skin is definately toxic.
Hahahaargh hurry up Shortie never mind the camera, break oot the blowpipes, Ahahahaaarghhaha.’
‘Aye hilarious lads, very fuckin funny.’
Ah’ll gie him his due though when we get tae the dance he’s straight up tae the bar. Never say die eh, mind you even supposin he was an ugly, scaly reptile there’s no one cunt that wid pay him any attention at this bar - that is fur sure. Ah mean it’s no as if he’d look oota place, lets face it in the mellee of; lizard kings, giant horned toads an spitting serpents whose gonna notice a wee inconspicuous tree froggy.
‘Looks like either we got here late or every other bastard started early,’ he moans.
‘Aye, both ah would guess, still we’re here noo eh, mind the nips.’
Shortie an Stevo have got the kilt on an r birlin roond the floor wi the same pair o sisters that they end up wi every year. Nae point in gettin them fuck all, they`ve both got hauf bottles in their sporrans. So me an the Mcgloosh take oor places for a nights serious drinking - yeehah.
‘China, Mac, wake up, c`mon wake up, ah’ve killed him.’
‘Eh? What the fuck? Who’s that? What the....’
‘Quick, open the door, its me Buckfast ah think ah’ve done Screw-tap in, open the fuckin door, pleeeease.’
‘Aye aye hud on, what r ye on aboot, ah’m still pished, yer ramblin on a loada shite.’
‘Naw ah’m no, honest ah skelped him wi a stane right in the heed ah think he`s snuffed, honest, c’mon China ye’ve got tae get up tae see if ye can find him. Please’
‘How dae ye mean find him, if he`s deed he’s bound tae be lyin.......oh never fuckin mind.
Where abouts? Ah mean what’s the general fuckin direction? Ah fuckin dinnae believe this! Yer fuckin well oota fuckin order here Buckfast, ah’m in no condition tae be lookin fur corpses in the middle o the fuckin night!’
So its aff intae the mist-filled Isle in search o a dead punk [there must be a song there somewhere]. Why fuckin me? ah’m too soft that’s what it is, fuckin soft touch China, that’s me. Mind you there`s naebody else, there’s absolutely nae chance o the McGloosh wakenin up an Stevo n Shortie were last seen bein led by the cock tae a nights local hospitality courtesy o the sisters Grim. Ah dunno whose the worst aff but ah’ve a feelin its no Screw-tap.
‘Zat you China?’
‘Aye, where the fuck r ye?’
‘Up here look, up here, ah dinnae want tae see that fuckin psycho-bitch, c’mon up.’
‘Ah’ve been searchin fur ye, Buckfast says that she`d done ye in!’
‘Haaaarghhaa, that’ll be the day, she skelped me in the heed wi a stane right enough, ah tell ye man she’s a pure fuckin nut job that lassie, ah’m havin nothin tae dae wi her man, she’s aff her fuckin heed.’
‘Yer no wrong there mate, here lets hae a look at yer napper. Mmmm its no too bad but ye better get it seen tae the morrow. Are ye commin back tae the van or what? Buckfast’s there.’
‘Yer jokin r ye no, ah wis just gonna crash under they trees ahve got a couple o sleepin bags like, fancy it.’
‘That’ll dae fur me mate, lets go.’
Margaret Thatcher! How the fuck can ye wake up wi a ragin hard-on after dreamin aboot Margaret Fuckin Thatcher? Ah swear tae God ah must be losin it! Ah’m dyin on a piss n aw, ah hate it when that happens but its a wee bit better when yer oot in the countryside, ah mean ye dinnae hae tae push it doon so’s as ye hit the pan like. Ah decide tae see how far over a clump o bushes ah can piss. Yess a good, strong, powerful arch that, ya beauty, well over the tap. AAAARGHHHHHH AAAAAAAAARGH AAAAAAAAAAAAARGH OOYACUNTCHA AAAAAAAAAAARGH
‘What? What? What the fuck is it, China you ok? Eh? Speak tae me man r ye awright? Eh?’
I’ve never felt pain like it, honest even when ah broke ma leg playin fitba it wisnae as bad as this. In fact ah would gladly swap ten o them fur this.
‘Who was it? How many wis there? Where the fuck r they? Speak tae me China! Speak tae me man!’
The truth is ah cannae speak tae him, ah cannae even move, aw ah can dae is lie on the ground clutchin ma throbbin cock. It feels like its been in a vice.
‘How wis ah supposed tae ken there was an electrified cattle fence there? Eh? How the fuck wis ah supposed tae ken that?’
‘Hahaha aye suppose so, hahaha ye coulda looked or somethin, lets have a deco, oh ya bastard that looks fuckin sair, China man that looks fuckin well sair. Is it sair man?
‘What the fuck dae you think ye fuckin doss cunt, is it sair, r you a fuckin weegie or somethin? is it fuckin sair.’
‘Woa hold up man, hold up. Its no ma fault. Ah wis only fuckin askin.’
‘Course it’s fuckin sair, look at it, ah mean when did ye ever see a cock that shape an colour eh? Course it’s fuckin sair, it’s fuckin agony.’
‘Hahahaha sorry fur laughin man but ah....hahahahaha.’
Ah just feel glad its no a young lassie ah get in the first-aid tent. The guy’s smirkin his heed aff though but ah suppose ye cannae blame him fur that. Don’t reckon its every day ye get some real-yin that’s stupid enough to piss on a live electric fence!
‘Keep this bandage on,’ he says, it will help painful rubbing and movement, try and take it easy and don’t drink a lot of fluid, urinating will be a problem. That’s you, go and get it checked out in a hospital when you get home but that’s the best I can do just now.’
Ah wis waiting fur ‘ye senseless fuckin bastard,’ it never came but ye could hardly have blamed him if it had.
As ah hobble doon tae the pub ah can make oot the familiar outline o the three-must-have- beers standin ootside guzzlin pints. Ahm hopin they’ve no met up wi Screw-tap, ahve sworn him tae secrecy but there`s aboot as much chance o him keepin his trap shut as the Pope gettin his hole this year.
‘What’s happened tae you?’
‘Groin strain, ah fucked masel intae a ditch lookin fur baw-heed last night.’ They aw nod in sympathy and mutter ‘oh rights,’ an ‘nae lucks,’ nice one, they dinnae ken. Thank fuck.
‘What r ye havin? pint? its ma round,’ asks Stevo.
‘Nah rum n black.’
‘Fuck sake China startin on the nips awready, hae a pint Jesus Christ man, we’re aw on the beer.’
‘Aye what r ye on aboot? Nips at this time o day, ye’ve got tae rehydrate yer poisoned system laddie,’ goes Shortie, ‘get him a pint. Ah’m leavin at ten sharp the morrow China, ah wis just tellin the lads, so if yer no there - tough. Promised ma old man the van likes.’
Stevo comes back wi pints aw round, ah can just feel the agonisin hot piss surgin through ma discoloured swollen penis but what could ah dae? Refuse? Yeah right! Ach ah`m needin a pint anyway.
‘Pitched a tent at the usual spec, goes the McGloosh, ‘there’s a few folk fae back hame there an aw,’ an he leans forward ‘that Marie fae John Menzies is there wi her mate, nae sign o Jogger like,’ an ye winks an gies me a nudge.
‘That’s good,’ ah say but the wry devious smile just doesnae happen. Naw no this time.
The concert just isnae happenin either, ah wis fine when John Martyn’s acoustic set was on but when the electric band started up every fucker went mad and ma cock just isnae up tae aw the movin aboot. So ah decide tae retire tae the pub before Runrig come on. That’s the last thing ah need. Besides, they’re shite.
Screw-tap’s propin up the bar, nice one, a bit o company, ah shoulda known he’da been here - folk music no really bein his bag likes. Naw he just comes up fur the fun an games. But when ah get closer ah can see just how pished he is. Fuck sake his puss is nearly as scarlet as the McGlooshes usually is.
‘Hey China, how’s the cock man?’
Which if ye didnae ken any better ye would probably take for some kinda friendly greetin.
‘Keep the voice doon, fur fuck sake. Its bandaged up, but ah hud tae get oot o that madness up the road.’
‘Who`s on? that Runrig is it no. Ach its just a loada teuchter pish anyways man, yer better aff in here. Fancy a Snakey?’
‘Aye why no. Howja make a snake-bite in Arizona?’
‘Dinnae ken.’
‘Stand on it’s tail.’
‘Hahaha aye and if it’s yer mate just hope it doesnea bite his erse. Ah mean whose gonna suck that oot.’
‘No fuckin me anyways.’
‘Hahahaha’
There’s a few fires on the go when we eventually stagger up tae the campsite armed with a cargo o cider n lager. This one nearest sounds lively enough so that`ll dae nicely.
‘They’ve been at it a while noo,’ says this big hippy cunt pointin tae a heavin mass o blankets in front o the fire. At first ah dinnae ken what he’s on aboot but ah soon realise its a couple shaggin fuck oota each other. Whether they ken [or care] anybody else is aboot is a mystery but they’re obviously the welcome source o entertainment. Fuck me they’re really startin tae get it on. Much to the audiences delight of course.
‘Mmmmph, mmmmph, oooooooh, yes, yes, mmmmmmmmph, mmmmmmph, aaaaaah, mmmmmph, spunk, yes, spunk, mmmph gimme spunk,oooooya, aaaaaaaargh.’
Every cunt starts clappin an hootin when they finish. The blankets split apart an the grinnin pusses o ma two friends McGloosh an Buckfast come loomin oot the openin.
‘Looks like she was on tap,’ ah say tae Screw-tap. But he’s gone.
Ah feel really glad ahm on ma own in the tent, nice one. Plenty o room and lookin forward tae a decent nights kip fur a change. Ah roll a joint an make masel up a final snakey. Ma cock`s still achin but its no the searin agony that it’s been of late. The drink an dope are kickin in fine, in fact ahm feelin really dozy awready ......ah....feel...... heed down...zzzzzzz.
‘Hi babes, its me, wakey wakey its time tae get shakey, China wake up darlin its me Marie.’
Oh fuck, Jesus Christ why fuckin me, Eh? Why the fuck. Better say somethin before she gets round tae grabbin at ma cock. She’s no usually the slow type.
‘Uuuuuh, whaaaaaaa Marie? Uuuuuuh.’
‘Hahahaha sorry babes, are ye oot yer box? Its ok ah’ll just snuggle in, its no long till mornin time, haha ah can wait,’ an she gies ma erse a squeeze. How the fuck ah’m ah gonna get oota this one? She’ll be expectin a good seein to!
‘Shortie’s away China, we’ve missed him.’
‘What already, what’s the time like? ach never mind, we’ll walk tae the ferry an hitch it fae there. Never mind Mac, we’ll get there man.’ We start tae walk but we’ve no gone far when an old guy in a tractor n trailer stops an offers us a lift tae the ferry, so we jump in. Then the rain comes. Ye could see it commin over the hill like some kinda biblical plague. There’s an old tarpaulin in the trailer so we huddle underneath that.
‘Did ye shag that wee Marie last night then?’
‘Naw ah fuckin never, thanks tae you ye fuckin doss cunt.’
‘Eh? Me? What the fuck’s it got tae dae wi me?’
‘Well ah wis ootama tits like, so ah couldnae shag her when she came intae the tent but ah kent she wis there, so ah wis just bidin ma time tae the mornin.’
‘Aye, hahaha, the usual story man.’
‘Then aw o a sudden there’s like a huge rip an were gettin dragged along the ground in what’s left o the tent.’
‘Eh?’
‘Aye some stupit bastard had tied the guy rope tae the bumper o a camper van which drove off no realisin, takin half the tent an us wi them.’
‘Hahahaha that’ll have been me then eh? hahahaha, sorry man.’
‘It wis kinda funny right enough, but she didnae seem tae see it that way, she crawled back intae her mates tent in a massive huff. So ah just stayed up an finished off the cans.’
‘Hahahaha that’s woman fur ye man, nae sense oh humour, haha.’
‘Aye well ye could say it’s the first time a condemned man has been saved by the rope.’
‘Hahaha aye, the trick is tae keep the knot nice n tight eh? Mind you ye musta been a wee bit pissed off yersel, ah mean she’s a wee ride.’
Ah just say nothin n shrug ma shoulders.
As ah look over onto the sea it comes tae me that this is the same stretch of water that one Jacobite rebel Charles Stewart [the bonnie prince] was rowed over tae safety. Defeated, despondent and disguised with Cumberland’s murderous hoards scourin the land thirsty for his blood. An ah cannae help thinkin that the jammy bastard never had it so good
Archived reader comments
These comments are preserved as part of the historical archive and are read-only.
Re: Over The Sea To Skye
Nae, Ah didnae unstan' a feckin' wurd of ut!
Re: Over The Sea To Skye
superb. brilliant. excellent. made me laugh like a drain and pop out for a pint (or three). ta!
Re: Over The Sea To Skye
as always, well-written, engaging. Just wish you'd try your hand at something other than drunken scotsmen shagging (or not)
ps. I thought electric fences were low current - so while the shock is pretty 'shocking' no harm (burn) occurs - otherwise cows would have bandaged noses! I once read an Arthur Hailey novel where the bloke's prick was burned off by an electricity pylon - thought HE was weird too! :-)
Re: Over The Sea To Skye
yeah well its a subject close to my heart...*Grin*thanx for the comment....ps I`m no gonna piss on one to find out anyway!!!